REFUXIO DE ANIMAIS SI, CANCEIRA NON. APOIA COA TUA SINATURA ESTA REIVINDICACIÓN.

 O Refuxio de Animais de Cambados ven de facer publica a seguinte nota:

“Queremos que as instalacións mancomunadas do Salnés sexan xestionadas polo Refuxio de Animais de Cambados e non por unha empresa. Deputación de Pontevedra: queremos un refuxio de animais, non unha canceira. Na asociación Protectora de Animais de Cambados levamos recollendo 13 anos, recuperando, rehabilitando e conseguindo novos fogares para os

animais abandonados na bisbarra do Salnés, en Pontevedra. Realizamos terapia con animais abandonados do refuxio en centros de autismo e de discapacitados, formamos animais abandonados como cans guía... E todo iso de forma completamente altruísta.

Luis Aragunde só utiliza os
animais "para utilizalos".

Cando os concellos da zona construíron un novo centro de recollida de animais abandonados, nós presentamos o único proxecto válido para xestionalo, cun proxecto que foi cualificado de "pioneiro e ideal". Non obstante as portas do centro nunca chegaron a abrirse por falta de presuposto e a Mancomunidade nunca finalizou o proceso de concesión.

Agora a Deputación Provincial de Pontevedra quere abrir finalmente o refuxio, pero nega calquera relación coas xestións realizadas pola Mancomunidade co noso refuxio para xestionalo hai máis dun ano. A Deputación vai abrir un novo concurso para a súa xestión, aberto a empresas, cando sabe perfectamente que unha protectora de animais non ten capacidade para facer fronte aos avais e garantías que esixe este tipo de concurso.

Os refuxios para animais deberían estar xestionados por asociacións de persoas que aman e respectan os animais, e non por empresas privadas que buscan facer diso un negocio, e simplemente recollen e sacrifican animais sen ningún tipo de miramentos.

Xestionar este refuxio permitiríanos axudar a máis animais e crear un "Centro de Recuperación e Reinserción Animal" con actividades e accións sociais orientadas a todas as idades e colectivos especiais, converténdoo non só en algo mellor que unha canceira senón nun centro pioneiro a nivel autonómico e estatal. Que ademais sería auto financiable nun prazo de 24 a 36 meses dende a súa apertura supoñendo polo tanto un aforro para a Administración Pública. Pero a Deputación non nos quere recibir, négannos a oportunidade de demostrarllo e fannos competir con empresas privadas e semipúblicas de recollida e tratamento de animais nas que predomina o beneficio económico.

O que pedimos é que se respecten as xestións realizadas por nós sobre o devandito centro, respéctense os nosos dereitos sobre o proxecto realizado que intenta plaxiarse e se dunha oportunidade ao dereito á vida dos animais e non a que sexan condenados a ser sacrificados aos 20 días.

Apoiade a nosa causa. Imos impedir que un centro que debería protexer os animais se converta nun mero matadoiro. Asina premendo AQUÍ, ou na columna da dereita.

Louzán ten moita ourella pero pouco oido.

AO ASINAR A PETICIÓN ESTARÁS A ENVIAR ESTA CARTA

DESTINATARIO: SR. D. RAFAEL LOUZÁN, PRESIDENTE DADIPUTACION PROVINCIAL DE PONTEVEDRA

Excelentísimo Sr. Louzán:

A Asociación Protectora de Animais de Cambados leva moitos anos recollendo, recuperando, rehabilitando e conseguindo novos fogares para os animais abandonados na bisbarra do Salnés, en Pontevedra.

O Refuxio de Animais de Cambados converteuse nun referente non só a nivel autonómico senón nacional, asesorando a diversas asociacións que utilizan a súa guía de traballo, visitan as súas instalacións e se forma con eles para aplicar os coñecementos adquiridos do seu proxecto noutras provincias.

No ano 2010 esta asociación presentou, a petición da Mancomunidade do Salnés, o proxecto e plan de viabilidade, posta en marcha e autofinanciamento para a xestión do centro de recollida de animais abandonados da Mancomunidade do Salnés cun proxecto que foi cualificado de "pioneiro e ideal", e que nun prazo de 24 a 36 meses sería autónomo e auto financiable. Desgraciadamente este centro non chegou a abrirse por falta de recursos.

Agora, a titularidade do devandito centro foi cedida á Deputación de Pontevedra, facendose cargo deste centro, e en lugar de respectar todo o traballo realizado durante case 13 anos polo Refuxio de Animais de Cambados na bisbarra do Salnés e na xestión do devandito centro, pretende lanzar un concurso novo coa posibilidade de adxudicación a unha empresa privada. A súa intención de realizar un concurso público ou a adxudicación deste centro a empresas deixa as asociacións en minoría de condicións, pois de todos é sabido que unha asociación sen ánimo de lucro e altruísta non pode facer fronte ás garantías e avais necesarios para poder obter a adxudicación definitiva.

Moi ben se lle da o noso Alcalde sair na foto.

As empresas privadas dedicadas á recollida de animais abandonados non realizan campañas de concienciación social nin esterilización, precisamente porque iría en contra do seu propio negocio, non fomenta as adopcións e dende logo non dedican nin tempo nin diñeiro á atención veterinaria, educación ou sociabilización dos animais recollidos, pasando polo tanto directamente á lista de animais para ser sacrificados sen recibir unha oportunidade para poder sobrevivir.

Por todo iso pídolle que respecte as xestións realizadas durante estes últimos anos e o seu traballo para levalas a cabo e permita á protectora de animais de Cambados que poña en marcha o seu antigo proxecto, que coida e respecta os animais e ten un importante compoñente de acción social e económico para a cidadanía e a administración pública.

Espero que faga valer a opinion e decisión de nós os cidadáns.

Atentamente,"

       

                        

Para unha mellor navegación por este blog  usa o navegador GOOGLE CHROME. Descarga GOOGLE CHROME premendo AQUÍ.