31 de xan. de 2020

IMPORTANTE INICIATIVA PARA O CRECEMENTO DE CAMBADOS


O desenvolvemento urbanístico de Cambados estivo presente nos programas electorais das 5 candidaturas que se presentaron ás municiapis de maio de 2019.

PP, PSOE e PODE apostaban abertamente pola realización dun PXOM, mentres que Somos Cambados e BNG, máis claramente a candidatura de Víctor Caamaño, apostaban polo desenvolvemento das Unidades de Xestión contempladas nas normas subsidiarias de 1995 ante a dificultade de realizar un PXOM, que pola súa complexidade demoraría outros 10 anos máis o necesario desenvolvemento urbanístico de Cambados, e que ademais reduciría considerablemente o valor das parcelas no rural ao reducir a súa edificabilidade.

Chama a a tención que o PP esixa agora a realización dun PXOM cando estiveron gobernando Cambados ininterropindamente con maioría absoluta durante 28 anos, e non foron quen de facelo.
UNIDADE DE XESTIÓN 6 A PACHECA


O obxectivo desta Unidade de Xestión é enriquecer as conexións rodadas na Avenida da Pastora. Así, abrirase un novo vial que conecte a Avenida da Pastora coa Pacheca, co que se dará cumprimento a unha demanda dos veciños da zona que lles posibilitará acceder ao casco urbano e a outras zonas do municipio dunha forma máis doada ao tempo que se abre un novo vial cercano ao casco urbano.

Esta actuación contempla un total de 3.040 m2 de novas zonas verdes e equipamentos municipais, dos 1.600 m2 serán de zonas verdes e un total de 1.440 m2 de equipamentos municipais (terreos nos que o Concello poderá destinalos a infraestrutras deportivas, culturais, etc.); así como 66 prazas de aparcamentos nas novas vivendas e 17 prazas públicas de aparcamento na rúa.

UNIDADE DE XESTIÓN 8 COLEXIO DE SAN TOMÉ


O obxectivo desta Unidade de Xestión é a apertura dunha vía de conexión entre a rúa Os Olmos e o Camiño da Grenla. Actuación moi demandada polos veciños da zona e pola comunidade educativa do colexio de San Tomé.

Esta actuación contempla un total de 1,900 m2 de zonas verdes e equipamentos municipais, dos que 660 m2 serán de zonas verdes e 1.009 m2 de equipamentos dotacionais municipais, así como 62 prazas de aparcamentos nas novas vivendas e 15 prazas públicas de aparcamento na rúa. 

UNIDADE DE XESTIÓN 10 VARIANTE DE FEFIÑÁNS


O obxectivo desta Unidade de Xestión é a formalización da fronte da nova variante de Fefiñáns tendo como referencia a finca do Pazo. Así mesmo, contémplanse terreos para unha posible ampliación do cementerio de Fefiñáns.
Esta actuación contempla  un total de 4.120 m2 de zonas verdes e equipamentos municipais, dos que 1.854 m2 serán de zonas verdes e 2.060 m2 de equipamentos municipais, así como 113 prazas de aparcamentos nas novas vivendas e 28 prazas públicas de aparcamento na rúa.



26 de nov. de 2019

ABRAZAR A NAICIÑA ESTREOU ONTE O VÍDEO "NON ESTÁS SOA" DIRIXIDO POR ARIADNA CORDAL

A asociación pola defensa dos dereitos das mulleres Abrazar a Naiciña presentaba no 25N un vídeo dirixido por Ariadna Cordal titulado "Non estás soa", no que transmiten a todas aquelas mulleres que están padecendo violencias machistas que sempre terán alguén con quen contar en momentos tan duros coma estes. O vídeo conta coa colaboración de varias cambadesas.

A continuación deixamos o vídeo para que poidades visionalo.

18 de nov. de 2019

CAMBADOS PROTAGONISTA DO PROGRAMA DA TVG ANACOS DE VIDA


O vindeiro sábado 30 de novembro emitirase as 18:55 na TVG o programa Anacos de Vida ambientado na nosa vila. O programa protagonízano nenos do colexio de San Tomé e as mulleres da nosa contorna. Tamén serán protagonistas o viño, o mar, o teatro e moitas cousas máis que de seguro farán as delicias de tódolos cambadeses.



Na produción do programa traballa a cambadesa Julia González Yañez como cámara e foi no seu perfil de facebook onde tivemos noticia da emisión deste sábado.



No programa Anacos de vida segundo contan na súa propia sinopse normalmente podemos ver o seguinte:
“En Anacos de Vida percorremos Galicia na procura das pequenas e grandes historias que hai tralas mellores fotos antigas do país. Imaxes e historias que nos emocionan porque son unha parte esencial das nosas raíces, do que fomos, do que somos e do que podemos chegar a ser como pobo.  
Cada capítulo de Anacos de Vida é unha viaxe sorprendente onde interactúan os maiores, que saben das historias que agochan as imaxes antigas, e os novos, que andan na procura das mellores fotos e historias do seu concello, animados por dous presentadores que veñen dende o pasado na súa máquina do tempo.  
O vello bus de Anacos de Vida percorre as aldeas e vilas de Galicia para descubrirnos esas fotos que nos falan das pequenas historias que nunca saen nos libros nin na tele. Cada programa é unha emocionante viaxe no tempo a través das imaxes e de tres historias, a foto do pasado, a foto por facer e a foto misteriosa.”



14 de nov. de 2019

CAMBADOS CELEBRA O DÍA INTERNACIONAL DO PATRIMONIO


Cambados súmase este ano a esta iniciativa de celebración. Neste senso, organízanse unha xornada con unha visita guiada ao Pazo de Fefiñans organizada pola “Asociación de amigos de Fefiñans” para 20 persoas, unha mesa redonda baixo o titulo “O Patrimonio Histórico de Cambados”, e a presentación dos proxectos de restauración e conservación previstas para o vindeiro ano das obras de singular relevancia do Concello de Cambados.



Ás 12:00 h comezaran as xornadas coa visita guiada ao Pazo de Fefiñans, para logo, ás 13:00 h realizar a mesa redonda na que participaran o Técnico Municipal de Patrimonio, Javier Montero, os Historiadores locais, Maribel Iglesias e Gumersindo Mosteiro, xunto coa Diseñadora e Arquitecta, María Nuñez e o restaurador José Rey Aguiño. Nestas xornadas tamén se fara a presentación e explicación do laborioso proceso de restauración de obras de gran valor e calidade que forman parte do patrimonio municipal, como son o Proxecto de Restauración e Conservación do Cruceiro de Terra Santa (O Cruceiro- Vilariño) cun Orzamento de 12.434,31 €., a Colaboración para a Restauración do Conxunto Escultórico da Divina Pastora (Capela da Pastora), e o Proxecto de eliminación e limpeza de “grafittis” no muro Norte da Capela da Pastora, no que se aproveitará para eliminar as xuntas actuais de cemento “Portlan” para a execución dun novo encintado de morteiro que se integre mellor coa fábrica de pedra. Este proxecto está presupostado nun total de 7.000 €.

Tamén se explicará a Recuperación das pezas de pedra que formaban a canle de abastecemento de auga do antigo Convento de San Francisco, que serán depositadas no xardín da Igrexa Parroquial, como recordo e evocación dun dos elementos esenciais da antiga finca do Convento.

Traballos de Arqueoloxía na Torre


Por outra banda no vindeiro ano esta previsto dende o departamento de Patrimonio a construción dun gavión para protexer as estruturas arqueolóxicas e o levantamento dun mapa topográfico do subsolo mediante xeorradar na Illa de San Saturniño. Empregarase esta técnica non invasiva co fin de obter información sobre as estruturas antigas soterradas no subsolo da Illa sen necesidade dunha intervención que altere a súa orografía e topografía, xa moi deteriorada pola acción das mareas e do cambio climático. Con esta técnica preténdese estudar os restos existentes para verificar a existencia da antiga casa-pazo e da capela edificadas na Baixa Idade Media, así como outros restos de épocas anteriores, profundizando no coñecemento desta Illa da Figueira como cerne da Vila de Santomé.

Tamén dentro do Conxunto Histórico de Cambados dende a area de Patrimonio o Concello quere manter o compromiso para axilizar os prazos nas licenzas de obra mediante a redución da periodicidade das Comisións de Patrimonio, xa se celebraron unha no mes de outubro e outra no mes de novembro, e a apertura dunha nova Convocatoria 2020 para a solicitude de axudas a fondo perdido para a restauración e rehabilitación de vivendas no Conxunto Histórico, cunha dotación de 150.000 €, que se engadirán aos 55.000 € xa executados no 2019.

Os interesados en participar na visita gratuíta guiada ao Pazo limitada a 20 persoas teñen que inscribirse na Oficina de Consumo municipal no Concello ou enviar correo electrónico ao mail consumo.cambados@gmail.com

12 de nov. de 2019

CAMBADOS ORGANIZA AS V XORNADAS PARA EMPRENDEDORES


A concellería liderada pola edil Carolina Laya, organiza a V edición dunhas xornadas que pretenden fomentar a cultura do emprendemento empresarial. Será o vindeiro día 14 de Novembro no auditorio da Xuventude, de 10 a 13 horas.



Dentro das mesmas haberá charlas e unha mesa redonda, co obxectivo de deixar claras aos asistentes as claves para poñer en marcha un negocio.

A parte máis técnica virá a cargo de representantes de Abanca coa presentación dos microcréditos, o Igape que presentará as axudas institucionais e Zona Centro que falará dende o punto de vista das novas tecnoloxías e as vantaxes do asociacionismo.

Os emprendedores que contarán a súa experiencia serán:
  •          Ruben Outeda de Versos de Ruda
  •          Cristina García de Algas La Patrona
  •          Nuria Daporta do sector da Moda
  •          Xoel Dios de Xoia Software Development Augmented Reality & Virtual Reality

Ben seguro que estas persoas exporán, ademais das claves anteriormente comentadas, os principais problemas que se encontraron á hora de poñer en marcha a súa idea de negocio.

Contará entre o público asistente con alumnos dos ciclos formativos do Asorey e do obradoiro de emprego Cambados Emprendedor.

Esta actividade organizada dende a área de promoción económica do Concello de Cambados é unha moi boa oportunidade para todos aqueles que queren poñer en marcha algunha idea de negocio e confrontala con outras que xa están consolidadas no mercado, ademais de ter acceso a toda a información dos pasos máis importantes a seguir á hora de emprender ou a onde deben acudir para conseguir máis información de temas concretos.

11 de nov. de 2019

A HISTORIA DA NOSA VILA A ESCENA NA CASA DE GALICIA EN MADRID


Semana importante para os Cambadeses xa que a nosa historia vai a ser a protagonista na casa de Galicia en Madrid. No acto presentaranse diferentes libros publicados nos últimos anos para recuperar a historia da nosa vila.

O acto contará coa presenza dos cambadeses Francisco Fernández Rei (catedrático da USC e membro da RAG) e Fátima Abal (alcaldesa de Cambados) e estarán tamén presidindo o acto: Jose María Pérez “Peridis” (arquitecto, humorista e escritor), Javier García Fernández (Subsecretario de Cultura) e Alejandro Tiana Ferrer (Secretario de Estado de Educación e F.P.).

No acto presentaranse obras que recollen a historia de institucións locais, ben presentes na memoria colectiva como: A banda de Música de Castrelo (1990, 2000, 2015), A Xuventude (2009), O Pósito (2017), A Escola do Convento (2019). Noutras fanse estudios biográficos sobre cambadeses senlleiros: Cabanillas (2009), Asorey (2018). Tamén se presentan recompilacións de fotografías antigas: Cambados dos tempos idos (s.d.), Cambados, século XX (2000), Cambados cen anos a través da fotografía (2005), A memoria de Cambados, Álbum de postais (2005).

O patrimonio cultural e a orixe histórica do actual municipio son obxecto do estudo exhaustivo: A torre e a sombra (2018) ou das síntesis monográficas: O mar en Cambados (2001), A Segunda República en Cmabados (2004), O cine en Cambados (2009), Breve historia de Cambados (2017).

Outras iniciativas destacables son as que tratan de recuperar recordos persoais a través de entrevistas: A memoria das palabras (2018), ou de sacar á luz informacións longo tempo ocultadas: A represión franquista en Cambados (2019).

Tamén levan o selo do patrocinio municipal algúns dos encomiables esforzos da fundación Plácido Castro co fin de recuperar a figura intelectual e política deste políglota, cambadés de adopción.

Finalmente débense subliñar a prometedora revista cultural presentada este ano: Cen follas de Artes e letras (2019-) e a veterana publicación anual: Open Internacional de Xadrez Albariño, que leva trinta e cinco anos recollendo estudos e achegas históricas de interese local.

O conxunto destas iniciativas, combinando fontes escritas e orais, das que se presenta unha escolleita na Casa de Galicia en Madrid, merece ser salientado e difundido como exemplo do valor da microhistoria na historiografía contemporánea.



6 de ago. de 2019

VOLVE SERÁN DE TROULA

A continuación reproducimos a nota de prensa que os organizadores nos enviaron cando presentaron esta edición de Serán de Troula, con unha pequena modificación na ubicación do primeiro concerto:



"Este vran présentase a terceira edición do SERÁN DE TROULA, un ciclo de concertos ao aire libre que naceu coa finalidade de satisfacer as necesidades lúdicas do noso pobo ofertando unha porgramación musical gratuita e de calidade para tódolos públicos.

Seguindo a dinámica das anteriores edicións, o ciclo constará de tres sesións protagonizadas por bandas de distintos xéneros musicais.

Tendo en conta a indiscutible e crecente ola de talento musical que xurdiu nos últimos anos en Cambados, Serán de Troula quere contar coa colaboración dos tres selos discográficos
cambadeses activos neste momento, ofrecéndolles un espacio ao remate de cada concerto para que amosen parte do seu traballo.

O XOVES 8 DE AGOSTO ás 21:00 da tarde no parque de Torrado, inauguramos o Serán de Troula con Juzz. Unha banda de jazz liderada por Virxilio da Silva, que chega á nosa vila para presentar o seu último traballo con nome homónimo á propia banda. Froito dos últimos anos de experimentación cunha música influenciada do rock máis psicodélico e ácido de finais dos 60 pasando polo pop vangardista máis experimental. Unha música que ten como máxima a búsqueda da liberdade máis alá da súa clasificación nun xénero determinado.

Para rematar a primeira xornada contamos cunha pinchada a cargo de Fonosaurios, o primeiro dos tres selos discográficos cambadeses que terán o seu propio espazo.

Fonosaurios, como ben dixemos, é un selo de recente creación, encargado tamén de configurar a programación cultural de O Encontro e a Krazzy Kray, que nace co fin de dar visibilidade ao grandísimo talento descoñecido da nosa terra. Apostando sempre pola calidade e o talento musical da nosa escena.

O XOVES 15 DE AGOSTO na Praza de Alfredo Brañas, abriremos o Serán cunha descarga de rock psicodélico, de base setentera e colorido indie. Sol, Azufre, Sal, Tierra e La Santa preséntanse enfundados en túnicas e ocultos detrás de mascaras baixo o nome de Basanta.

Despois de percorrer un puñado de festivais por toda a Península chegan a Cambados para presentar o seu último traballo: Colorama, un álbum que veu a luz en abril de 2018 da man doselo C4Music e producido por Paco Loco.

A continuación contaremos coa pinchada de Ulomanía Coop. que leva dende maio de 2016
funcionando como plataforma para a autoedición de discos, conectando a diversos creadores, e coordinando o proceso de fabricación ata conseguir un artefacto final en vinilo.

O XOVES 22 DE AGOSTO terá lugar na Praza do Castriño a última entrega do Serán de Troula 2019. Comezamos co estreno de Mascada, que tal e como a propia banda se define son “un disparo de francotirador directo á cabeza de quen se poña a tiro. Balas de decibelios e graves disparadas por un baixo e unha batería á sinal de dúas voces berrando verdades. Simple e complexo, reducido e completo.”

The Bongo Club son a indiscutible nova promesa musical sueca que con máis de 300 shows ás súas espaldas en máis de 15 países diferentes conseguen levar o seu «Anybody Have A Lighter?» a número 1 no Rock Top 30 de Star FM en Alemania, por enriba de bandas como Pearl Jam o Motörhead.

No seu último traballo cabe destacar a labor de Owen Morris, o productor galés de moitos desesdiscos que marcaron a década dos 90, coñecido por producir míticas bandas como Oasis ou The Verve.

Por último pero non menos importante, pechamos o Serán coa pinchada de B4Project, que nace como resultado do que no seu día foron 504 e Bronquitis Crónica. Herdando o nome da galería de arte Borrón 4, da un paso adiante para ofrecer un espazo de grabación especializado en música urbana dando visibilidade á rica escena underground galega.

Así como a encargada do diseño do cartaz da pasada edición foi Julia González, coñecida entre outras cousas por gañar o concurso de deseño do Albariño do ano pasado, o deseño do cartaz desta terceira edición, vai da man do artista e deseñador gráfico Emmanuel Joven. Un cambadés graduado en Publicidade e Relaciones Públicas con interese na técnica do collage e fotomontaxe que plasmou con éxito o espíritu trouleiro deste proxecto.

Deste xeito, Serán de Troula conta co traballo de diferentes artistas gráficos da nosa terra,
poñendo en valor as cousas que aquí se fan.

Por último agradecer ao Concello de Cambados pola aposta e confianza neste proxecto un ano máis así como tódolos establecementos colaboradores: A Leria, La Embajada, Brothers, Baloca Bar, Riff Rock, Dönner Kebab Infante, Krazzy Kray, EnB e Taberna de Triana. Gracias tamen a tódolos e tódalas compañeiras que me acompañaron durante estas tres edicións, agardo vernos polos bares!"

6 de xul. de 2019

O VERÁN DA JOVITA. TODO O BO QUE SE PUIDO FACER E NON SE FIXO


Antes de comezar gustaríame facer constar o estupor polas formas da organización deste evento dende o minuto 1, a pesar disto promocionei a iniciativa dende este puntiño da rede, xa que nos parecía loable o esforzo tanto dende o Concello como do organizador de encher de contido un espazo infrautilizado do pobo.

Dito isto queremos aclarar en primeiro termo que dende aquí non imos dar os caches dos artistas que actuaron nestes eventos, xa que é algo que se negocia bolo a bolo e facer públicas estas cantidades penso que é unha puñalada á xente que puxo a súa arte a disposición dos teus parroquianos. O que si imos a facer é dicir que a cantidade que lle vai a custar o Concello de Cambados esta actitude xenerosa (cos cartos de todos) dun veciño de San Tomé ata o concerto do vindeiro 14 de xullo supera os 4.500 €. Tamén estamos en condicións de dicir que algúns dos cachés dos artistas que participan e participaron destes eventos non coinciden cos publicados polo organizador nas súas redes sociais. Tamén destacar que nas contas que fai o organizador inclúese un insistente “máis sonido” obviando que nalgunhas actuacións o prezo do son supera o caché do grupo. Dentro destes 4.500 euros non están incluidos os gastos do persoal que o concello ten que movilizar en cada actuación.


Porque se chama este artigo “todo o bo que se puido facer”?

Pois en primeiro lugar porque nos parece un “para o que me queda no convento cágome dentro” do concelleiro de cultura saínte, xa que o habitual cando te achegabas o seu despacho con unha proposta era que che pedira que presentases un proxecto cos obxectivos, custes, seguro de responsabilidade civil... por rexistro de entrada no concello. O que aquí escribe foi a inicios do ano pasado a presentar un festival e Cultura non poría máis que o son e o son correría a cargo doutra empresa distinta a que nos escolleramos no proxecto. O festival que presentábamos costaba 500 euros menos dos que leva gastados este veciño xeneroso (cos cartos de todos). 

En segundo lugar porque a promoción do evento en redes socias foi moi pobre e solo se fixo dende o Facebook do organizador. Foron ampliamente promocionados cando tocaba alguén de Cambados, pero polo feito de que estas persoas son moi coñecidas e respetadas e chegaban a moita máis xente dende os seus perfís en redes. Dende aquí dicir que non se me fixo chegar dende o organizador ningún dos eventos e que todo o que publquei o souben por outras canles.

En terceiro lugar porque este evento era unha moi boa ocasión para que en cada unha das actuacións unha asociación, un clube... puxera un posto, de comida por exemplo, e poder recadar cartos para as súas causas/equipos.

En derradeiro lugar porque se utiliza un nome que non é o da praza en cuestión, que se colleu o nome dunha persoa e que non se puxo isto en coñecemento da familia desta persoa antes de facelo público. Isto é a todas luces unha falta de respecto total e absoluta.

Rematar insistindo en que a idea (concertos en San Tomé), paréceme xenial, pero non se puxeron os cimentos necesarios para un evento destas características. Creo que a todos se nos queda ingrata a comparación si o lado da organización do Verán da Jovita poñemos as organizacións de Serán de Troula ou Ulo-Vermú.

20 de xuño de 2019

AXENDA CULTURAL ATMC

Na de semana do 21 ó 23 de xuño arrancamos axenda na Leria, onde teremos oportunidade de ver a Miguel Leiro. O irmán do gran Matías de Noite Fechada apunta boas maneiras e fará desfrutar os cambadeses coas súas versións de temas novos e clásicos de Rock estatal e internacional.



O sábado dende as nove da mañá o Club Juventud Cambados porá o broche a tempada, como cada ano co seu serán ou Festival Deportivo-Musical-Gastronómico no parque de Torrado. A parte deportiva estará co torneo 3x3 dos rapaces da base e dos senior. A nota musical correrá a cargo de agrupacións tradicionais, concertos e DJ. E como sempre o toque gastronómico contará con churrasco, empanada, mexilóns e outros pratos típicos nas romerías galegas.


O Cuernitour 2k19 continuará desta volta facendo parada na noite de San Xoán as 23:30 no ciclo ideado por Salvador Ribadomar e organizado polo Concello de Cambados "Verán da Jovita". Unha vez máis os Cuernicornios farán bailar a todos os que se acheguen a San Tomé. Desexamos de veras que o "Verán da Jovita" continúe durante todo o verán, pero tamén pensamos que o Concello debería ofertar unha barra a asociacións, organizacións ou clubes da vila que a queiran e poidan traballar, para conseguir que este evento reporte un beneficio máis alá do simplemente cultural.


17 de xuño de 2019

ALGUNHAS (NECESARIAS) ACLARACIÓNS POSTELECTORAIS

Como parece que nos últimos días hai algúns interesados en enlamar o terreo de xogo , imos tentar aclarar, na medida das nosas posibildiades, a situación postelectoral:
  • 26/05. Resultados das eleccións: PP 7, PSOE 4, SOMOS CAMBADOS 3, BNG 2, CAMBADOS PODE 1.
    • Con respecto ao 2015, baixan un concelleiro o PP (de 8 a 7) e o BNG (de 3 a 2), e suben PSOE (de 3 a 4) e SOMOS (de 2 a 3).
    • Das 4 forzas do cuatripartito todas gañan votos menos o BNG, que perde 190.
    • As 3 forzas de esquerdas suman 9 concelleiros (maioría absoluta), feito que non sucedía desde o ano 1983.
  • 26/05. Tras coñecerse os resultados, o candidato de Somos Cambados chama á candidata socialista para felicitala e amosarlle a vontade de chegar a un acordo de goberno que facilite a súa investidura.
  • 27/05. O PP anuncia que vai recurrir uns votos nulos, a pesar de conter insultos contra esa organización política e o seu candidato. As posibilidades de que prospere ese recurso son absolutamente inexistentes.
  • 27/05... Víctor Caamaño di q non esperaban a baixada electoral porque "traballamos moito", e plantearanse se estar ou non no próximo goberno.
  • 31/05. A asamblea de Somos Cambados acorda como única condición para votar a investidura de Fátima Abal como alcaldesa a existencia dun pacto de goberno.
  • 02/06. O PSOE comunica que empraza as negociacións sobre o goberno municipal para despois de coñecer a resolución do recurso presentado polo PP, “momento no que xa se perfilará de forma definitiva a composición do futuro goberno”. Ademais, o PSOE di que “non acepta imposicións de datas nin de contido”, e que “non cederá a ningunha chantaxe nin amenaza”... Onde están esas “chantaxes” e “ameazas”?
  • 07/06. Ás 11:00 h., a Xunta Electoral Central, como era totalmente previsible, rexeita o recurso do PP sobre os votos nulos.
  • 09/06. Dous días despois da resolución da XEC, Somos Cambados comunica que a 6 días da investidura non recibíu ningunha chamada do PSOE, e engade que “Somos Cambados non entende porqué se está a adiar tanto a celebración de reunións que favorezan ese pacto”.
  • 10/06. O BNG lamenta a “inxeplícavel actitude” do PSOE por convocar “conversas bilaterais que non conducen a nada”, en vez de convocar “a reunión de negociación”. Din que apostan por un “goberno de esquerdas e nacionalista” e que non asistirán ás reunións bilaterais.
  • 10/06. A candidata do PSOE reúnese con Cambados Pode, que non é decisivo para configurar a maioría, e di en TV Salnés que non convocou reunións de negociación do pacto de goberno porque sería un “ridículo espantoso” facer un pacto de goberno antes de saber o resultado da reclamación presentada polo PP.
    • Durante toda esta semana comezan a asinarse en moitas cidades e vilas galegas pactos de goberno entre as forzas de esquerdas, mentres en Cambados aínda non está nin convocada a primeira reunión entre as 3 forzas que teñen a maioría no Pleno municipal.
  • 11/06. O PSOE convoca unha reunión PSOE-Somos Cambados. Para deixar clara a súa vontade de diálogo e de avanzar no pacto de goberno, Somos Cambados anuncia que asistirá á reunión, pero insiste en que tamén debería estar presente o BNG. Insta a Fátima Abal a convocar canto antes unha reunión entre as 3 forzas. o BNG é citado no día seguinte por ambas forzas, pero decide adiar as negociacións o xoves 13/06 por "problemas de axenda".
  • 13/06. A menos de 48 horas para a investidura celébrase a primeira reunión entre as 3 forzas.
  • 13/06. Trala reunión, o BNG comunica que se reafirma na idea de conformar un “goberno municipal de esquerdas e nacionalista”, e lamenta que “non todas as forzas actuaran con igual rapidez”.
  • 14/06. Na tarde do venres, a poucas horas da celebración do Pleno de investidura, celébrase a segunda reunión entre as 3 forzas.
  • 14/06. Trala reunión e despois de ser aprobado polo organos locais do PSOE e pola asamblea de Somos Cambados, asínase o pacto de goberno entre estas dúas forzas. O BNG rechaza sumarse a este pacto. Por iniciativa de Somos Cambados, respéctanse todas as áreas de goberno que xestionaba o BNG a pesar de perder representación.
  • 15/06. Fátima Abal é investida alcaldesa cos votos das 3 forzas da esquerda.
  • 15/06. O BNG califica de “reparto de botín” o acordo entre PSOE e Somos. Curiosa forma de ver as cousas..., cando non me gusta/interesa o pacto falo de “reparto do botín”, cando estou eu no pacto falo de “pacto que dá cumprimento á vontade da veciñanza”.
Nos últimos días é sorprendente a cantidade de comentarios nas redes sociais de destacados militantes de forzas políticas da esquerda cambadesa, xeralmente ben informados, aludindo a unha suposta avaricia de Somos Cambados nas negociacións. Segundo estas persoas, Somos quería “a alcaldía”, “deixar ao Bloque sen as áreas que xestionaba”, “repartir co PSOE a alcaldía por un período de dous anos cada un”, ou “xestionar Obras, Urbanismo e máis algunhas áreas dos nacionalistas”... Como poderedes comprobar, nada máis lonxe da realidade...
Na primeira reunión coas 3 forzas, Somos Cambados presentou un documento coas súas “propostas para debatilas co resto de forzas progresistas e asinar antes da sesión de investidura un pacto que configure un goberno municipal forte e estable”.
A primeira desas propostas é que, como non podía ser doutra forma, a alcaldía lle correspondía a Fátima Abal. Tamén se propoñía a representación proporcional de cada grupo político na Xunta de Goberno local, na Mancomunidade e nos outros organismos onde está presente o Concello de Cambados (Campo de Golf de Meis, Fondo Galego de Cooperación, etc.), así como a distribución das tenencias da alcaldía en función da representación obtida por cada forza.
Nese documento, Somos tamén propoñía que no caso de que as tres forzas quixesen participar no goberno manterían as mesmas áreas do pasado mandato, aínda que tiveran unha representación menor na nova Corporación. Por tanto, onde está esa suposta avaricia á que se alude interesadamente nas redes sociais...? De avaricia, nada. Máis ben , xenerosidade: Somos Cambados propón que todos os grupos manteñan a xestión das mesmas áreas que no mandato anterior, incluídas as do BNG, a pesar de contar menos representación.
Somos Cambados propoñía que as áreas xestionadas por Cambados Pode fosen xestionadas polas dúas forzas que incrementaron representación... Acaso non é lóxico que aquelas forzas políticas que conseguiron maior respaldo dos veciños e veciñas de Cambados teñan máis áreas de goberno en proporción á súa nova representación?
Outra das propostas presentadas por Somos Cambados nas negociacións foi a redución dun 15 % do coste total dos salarios da corporación, tendo en conta que no goberno municipal haberá un grupo menos que no mandato anterior.
Ademais, nese documento Somos Cambados falaba dunha serie de medidas para garantir un goberno municipal transparente, como o libre acceso de todos os membros do goberno aos expedientes de todas as áreas, ou, tal e como se recollía no pacto de goberno anterior, establecer uns mecanismos de seguimento do pacto para garantir o seu cumprimento.
Nese documento de debate presentado a PSOE e BNG, Somos Cambados propoñía a elaboración dun Programa de Goberno onde se recolleran as principais propostas dos grupos políticos para executar nese mandato. Ao parecer, este é un dos apartados que xerou menos problemas, porque máis alá dun par de matices, a sintonía entre os 3 grupos sobre as propostas que se incluirían no progrma de goberno é practicamente total, como así quedou demostrado nas reunións entre as 3 forzas.
Agora quedan días duros de negociacións onde o resentimento o único que vai facer é poñer paus nas rodas da formación do futuro goberno de esquerdas e nacionalista de Cambados. Señorxs a remangarse e a traballar e non boten órdagos que despois non sexan quen de defender na rúa.

13 de xuño de 2019

AXENDA CULTURAL ATMC

Fin de semana do 14 o 16 de xuño de 2019 con moita actividade cultural na nosa vila.

O venres as 20:00 nos xardíns de Torrado terá lugar a presentación de "Ramón Cabanillas do A áo Z", libro no que Ramón Caride fai unha escolma de varios poemas do poeta da raza seguindo o abecedario, do A de "Agras" ao Z de "Zanfona". O libro conta coas ilustracións de Xosé Cobas. A nota musical neste evento correrá a cargo de Kevi Aragunde.


O mesmo venres teremos na Leria as 23:00 unha nova actuación dos Cuernicornios, que porán a bailar a todos os que acudan coa súa rumba.


O sábado 15 teremos nova B4 party no AYF desta volta porán a música: SUSO FRESH X LAMAR, LOS BUENOS 'O PORTUGHÉS X WAVEB', CHEF KAREEM (GOODBYE SESSION) DJ SET. A festa finalizará con micro aberto para que todos aqueles que queiran podan ensinar as súas rimas. As B4 party voltarán en xullo.


Tamén o sábado no Brokers haberá festa OPENING SUMMER no que pinchará o DJ Xoel Muiños. Na festa haberá varios sorteos.


Pecharán a fin de semana o domingo as 13:00 horas Quilma e Os demos da Petaca que estrearán o "Verán da Jovita", nesta primeira ocasión en sesión vermú na Praza da Jovita en San Tomé


10 de xuño de 2019

Fátima Abal asegura que non hai tempo para firmar un “pacto serio”, mentres deixa pasar outro día crucial para chegar a un acordo con SOMOS e BNG

Hoxe puidemos ver outra vez a nosa alcaldesa en escena, outro día máis que vemos como da a cara nos medios e outro día máis que vemos pasar sen que se avance nas negociacións dese goberno de esquerdas que a aritmética electoral nos ofreceu logo do 26 de maio.

Nesta ocasión deixou coa boca aberta a moitos cambadeses e cambadesas facendo público que o seu primeiro contacto sería con Jose Ramón Abal, para acto seguido facer ver a intención de que se quería quedar coas concellerías de obras e urbanismo, as dúas máis importantes que manexaba o líder de Pode.



Deste xeito a alcaldesa en funcións deixa pasar un día máis dicindo por un lado que non hai tempo suficiente para chegar a un ”pacto serio” mentres que polo outro deixa caer as follas do calendario e perdendo oportunidades de acercarse a aqueles que as urnas lle deron como socios imprescindibles para a investidura e o mandato.

A líder do PSOE fala tamén do ridículo espantoso que suporía ter un pacto firmado antes de que os resultados electorais fosen definitivos, pero isto dise mentres os contactos informais entre os PSOE e o BNG son abertamente recoñecidos por ambas organizacións, iso si, sempre en petit comité e con nocturnidade e alevosía ¿Porque non se puideron ir acercando posturas en conversa informal e lonxe dos focos de cara un posible goberno tripartito nestas dúas semanas?

A miña conclusión é que Fátima Abal quere estirar a goma a ver ata onde pode chegar, pero debe ter coidado porque correo o risco de que rompa e tamén debe ter en conta o retroceso destes materiais cando rompen, xa que poden chegar a mancar.

9 de xuño de 2019

Reflexión de Maribel Iglesias no Blog o Umia

DE POLÍTICA MUNICIPAL


O próximo 15 de xuño terá lugar a investidura do novo alcalde ou alcaldesa de Cambados. Os resultados das pasadas eleccións quitáronlle a maioría absoluta ao PP e déronlla aos tres partidos de esquerda. Significativo é tamén que deixaron fóra dun posible goberno a JR Abal. Un político tóxico, arribista e interesado que tivo ao goberno cuadripartito anterior sometido a unha chantaxe permanente.  Os resultados foron claros: o partido de esquerda máis votado foi o PSOE. Fátima Abal ten que ser a alcaldesa. Pero o segundo máis votado foi Somos Cambados e debe ter un peso proporcional no novo goberno municipal. O Bloque baixou en votos e debe entender que o seu papel na nova corporación ten que ser menor. Así o mandaron as urnas. PSOE e BNG son dúas "grandes empresas da política", con intereses comúns en moitas vilas e cidades de Galicia e que non ven cos bos ollos a competencia de pequenos grupos municipalistas. Tenden, como calquera empresa , a eliminar competidores. E non deberían caer na tentación de "facer pinza" e antepoñer outros intereses aos de Cambados. Ábrese a oportunidade "histórica" dun goberno de esquerdas que mire só polos intereses da vila e o benestar dos seus habitantes, non o estraguemos. Pode que a cidadanía de Cambados non o perdoe cando en catro anos haxa que render contas.

6 de xuño de 2019

AXENDA CULTURAL ATMC

Este fin de semana a nivel cultural centra todos os focos un festival que mezcla como ningún tradición, música e deporte. Trátase da Arribada Gaélica organizada polo Cambados Gaélico. A continuación deixámosvos o programa completo:
  • Venres, 7 de junio de 2019
    • 19:00 Arribada dos barcos ó porto de tragove
    • 21:00 Foliada na Praza de Alfredo Brañas
    • 22:00 Concerto de Onte e Hoxe na Praza de Alfredo Brañas
  • Sábado, 8 de junio de 2019
    • 10:00 - 14:00 Torneo de Fútbol Gaélico
    • 16:00 - 2:00 Concertos no Parque de Torrado a cargo de:
    • 17:00 - 20:00 Pintacaras e animación infantil a cargo das Titiriteiras no Parque Torrado
Este evento está patrocinado polo Baloca


No Brokers teremos pinchada BYE BYE EXAMS a cargo de Jose Vargas onde haberá ademais varios sorteos.


Para rematar a fin de semana teremos a 4ª Andaina E Xornada Familiar A Prol De GaliciAME e organizada coa axuda de Xironsa no que Merchi estará acompañada por caras coñecidas como a de Xose Ramón Gayoso ou Diana Nogueira e contará coas actuacións do grupo Onte e Hoxe, do que forma parte Anxo Xesteira, e do pallaso Peter Punk.



Logo dun fin de semana sen case actividade, pasamos a outro repleto ata a bandeira.