ALUMNOS DO ASOREY GAÑAN O V CONCURSO GALEGO DE ROBÓTICA
A Institución Galega da Ciencia (IGACIENCIA), en colaboración coa Fundación Barrié, organizou na Coruña dende o luns 25 de febreiro ao venres 1 de marzo, o V Concurso Galego de Robótica A Maxia da Robótica, no cal participaron preto de 1.000 alumnos e 58 profesores de 29 centros educativos de toda Galicia e que tivo lugar na sede da Fundación Barrié (Cantón Grande, 9). A actividade estivo dirixida a educación secundaria e terceiro ciclo de educación primaria.
A Institución Galega da Ciencia (IGACIENCIA) vén promovendo e organizando esta actividade que se desenvolveu, en anos anteriores, coa colaboración dos Concellos respectivos, nas cidades de Lugo,Santiago, Burela e Lugo, de novo. Este ano celébrouse na sede da Fundación Barrié na Coruña, no marco de educaBarrié, a iniciativa da Fundación Barrié que aglutina toda a oferta educativa para a comunidade educativa galega, e máis especialmente no eido da súa actividade de divulgación da ciencia.
O obxectivo do obradoiro A maxia da robótica foi achegar á xente nova e á cidadanía en xeral ao mundo da robótica facéndoo comprensible e resaltando a súa importancia e as implicacións no seu propio futuro. Para iso bríndouse a oportunidade de participar en grupo na montaxe e programación dun robot móbil cun kit de LEGO. Dun xeito sinxelo e divertido o alumnado participante familiarizouse tanto cos robots como coa linguaxe da robótica. Para este obradoiro non foi necesario ter coñecementos en programación electrónica, pois a electrónica está integrada nun ladrillo intelixente e a programación realízase nun contorno visual sinxelo para que ata os máis pequenos poidan construír e deseñar os seus robots dando paso, despois da montaxe, á parte de programación.
Ao tempo que se pretendeu que sintan a paixón pola aprendizaxe, os rapaces e rapazas participantes intégraronse nun grupo no cal deben compartir obxectivos e realizar un traballo colaborativo para poder resolver os desafíos que se lles propón ao longo da experiencia. Ao remate do obradoiro, de dúas horas de duración, cada grupo acadou un número de puntos que lle permitiron optar aos premios do V Concurso Galego de Robótica 2013.
Alumnos de Secundaria do I.E.S. Asorey de Cambados foron, ao remate do mesmo, os brillantes gañadores desde V concurso.
Ningún comentario:
Publicar un comentario