Fai 4 anos, cando collían o club, recordo como o meu pai lles dicía a eles
e repetía na casa que deberían refundar o club, irse a 3ª rexional e dende aí,
xa saneado o club, tirar para arriba. Pero porque moita xente se plantexaba
esto? Cal era a situación do CJC hai 4 anos? Pois imos recordalo:
Fai 4 anos o club non tiña ningún tipo de control no apartado económico,
non existía libro contable, nin nada semellante que ofrecese claramente cal era
a situación do CJC no que a cartos se refire, polo tanto era imposible saber
cal era o punto de partida no momento que collían o equipo.
Cando se meteron a revisar cal era a situación, viron que o club estaba a
puntiño de recibir a sentencia da reclamación dos xogadores da tempada 2012/13
por impagos de salarios. Unha reclamación, sen apenas percorrido, se non
contase co recoñecemento desa débeda firmado por parte do anterior presidente.
A sentencia, que estaba a piques de saír, iría acompañada con case total
seguridade dunha inspección de traballo por non ter de alta a todos e cada un
dos xogadores denunciantes ante a seguridade social, ó ser recoñecida a
vinculación laboral por eses salarios impagados e recoñecidos.
Nos cartos, isto traducíase nunha débeda inicial duns 23.000 €. Débeda
que se renegociou cos xogadores, a directiva sempre agradece a predisposición
desta plantilla a negociar, de non acceder isto suporía a máis que segura
desaparición do club para non ter que facer fronte as posibles sancións
derivadas do xuizo. Recórdame o propio presidente (Matías Fontán), que o avogado
dos denunciantes non se explicaba como foran quen de convencelos e renegociar,
xa que vía que facilmente o xuízo estaba gañado pola súa parte. Nesta
negociación o club tamén aceptou facerse cargo de tódalas costas derivadas do xuízo.
Resumindo: club xudicializado, con unha máis que posible inspección de
traballo a volta da esquina, sen ningún tipo de control económico e débedas
deportivas ademais da débeda comentada anteriormente. De feito, esta directiva
paga o último salario da tempada 2014/2015.
A día de hoxe esta directiva deixa un club estruturado nos tres aspectos
fundamentais que conforman unha entidade deportiva: a social, a económica e a
deportiva.
En números isto tradúcese en que chegan a unha entidade con 80 socios e déixano
con uns 450, a pesar de que sempre foron ambiciosos e cren que a masa social do
CJC debe estar en torno os 600 socios. Para o recordo queda a campaña inicial “No meu peor momento
é cando máis te necesito” na que contou coa colaboración de ex xogadores,
amigos e socios.
No económico, na actual tempada unha vez rematadas as competicións, o CJC
poderá estar nun superhabit de entorno o 1% do presuposto.
A nivel deportivo sacan o club do pozo da segunda rexional e déixano na
quinta posición da rexional preferente. Cunha imaxe impoluta ante toda a vila.
Chegaron con unha base da que escapaban pais e nenos con unhas 150 fichas e
déixano con 320 federados. Ademáis, neste final de tempada estase a disputar a
fase de ascenso a liga galega de infantís e xogouse por primeira vez a fase
final do prestixioso campionato Arousa Fútbol 7, onde os nenos puideron medirse
ante equipos como o Barça, o Betis ou o Sporting de Braga entre outros.
No tocante a igualdade no deporte, esta directiva tamén deu un paso adiante
e foi quen decidiu crear o equipo senior femenino hai xa 3 anos.
Moi importante tamén o convenio de colaboración co Celta do que xa se
beneficiaron moitos nenos e que trae en exclusiva na nosa zona a escola de
asesoramento do R.C. Celta.
Para o recordo tamén quedará a defensa da entidade que fixeron, cando o Cambados foi noticia novamente por temas xa pasados e que non gardan ningún tipo de relación coa actual situación do club. Falo das novas saídas na prensa estatal a raíz do éxito da serie "Fariña".
Matías Fontán tamén me traslada as seguintes impresións:
“Considero que a situación actual do club non ten nada que ver coa que nos atopamos. Que o máis difícil na miña opinión está feito. Polo que animo a socios e simpatizantes a formar unha candidatura para seguir traballando por un club con moitos anos e moi querido no noso pobo. Convencido estou que terá continuidade o proxecto mais cedo que tarde.
Eu atópome satisfeito co resultado do noso traballo e que o tentamos facer o mellor posible cuns recursos moi escasos. Porque o final estas a competir con outros clubs e en temas económicos, desde logo, en inferioridade de condicións. Pero... demostrouse que non é o único importante e se conseguiron facer grandes equipos nestes anos, no que o equipo senior estivo en tres categorías distintas en 4 anos e nos catro anos foi un equipo punteiro en cada unha delas.
Para rematar, a veces non hai que ver onde estamos, senón do punto de partida onde estábamos. Que non quero dicir que o club seria máis grande aínda se en vez de atoparse na situación que estaba estivera mais estabilizado, pero isto nunca o vamos a saber... 4 anos non dan para moito máis”
A hora que publico estas liñas, aínda non hai coñecemento de que ninguén
dera o paso para coller a directiva, aínda que parece que hai xente que se está
comezando a achegar. O prazo para a presentación ampliouse 15 días máis sobre
os 15 iniciais e no momento no que apareza algún grupo de persoas interesado
farase unha asamblea informativa.
Para min estes rapaces son un referente na nosa vila e o caso destes 4 anos
do CJC debería ser estudado nas escolas de negocio que imparten mestrías en
xestión deportiva, xa que é un exemplo de facer as cousas ben dende o talento,
a formación e sobre todo dende o corazón.
Grazas a Matías Fontán pola súa boa disposición cando me puxen en contacto
con el para facer este artigo.
Ningún comentario:
Publicar un comentario