OS CAMBADESES LEIRO E PAZ PROTAGONISTAS DE "COORDENADAS NA ARTE GALEGA CONTEMPORANEA"

As coleccións de arte das dúas caixas, xuntas nunha mostra A exposición reúne as principais figuras da creación galega contemporánea As antigas coleccións de arte de Caixanova e de Caixa Galicia conflúen na mostra “Coordenadas na arte galega contemporánea”, que estes día podemos ver no Centro Social de Novacaixagalicia en Vigo. En mans de Novacaixagalicia (NCG) a primeira, unhas 5.500 pezas, e integrada no patrimonio de Novagalicia Banco a segunda, composta por máis de 1.300 obras, é a primeira vez que ambas as dúas coleccións se mesturan nunha montaxe, e fano en réxime de cesión
temporal. Este espírito de colaboración foi un dos aspectos máis destacados polo xerente de NCG, Guillermo Brea, na súa intervención. "A integración dos dous fondos potencia aínda máis as posibilidades expositivas", remarcou. Brea mostrouse satisfeita pola aprobación, no último consello de administración do banco, o pasado mes de xaneiro, dun plan de viabilidade para a Obra Social: 

Custou tempo e moito esforzo, pero significa que a Obra Social, despois de ser cuestionada, é posible este ano e que será viable e sostible no futuro". Co "desenvolvemento socioeconómico de Galicia" como misión principal de NCG, presentouse a mostra, que propón un percorrido polas artes plásticas, escultóricas e fotográficas do país de 1915 a 2011. 60 traballos de 52 creadores repártense uns mil metros cadrados de superficie expositiva para exemplificar unha proposta temática baseada nun cruzamento de eixes: Galicia e o ser humano, por dentro e cara a fóra. O mar e o home O mero paseo polas salas, ou mar, Verde, país, Inquedanzas e Escenarios, descobre unha gran variedade de asociacións significativas. O océano que pintou Germán Taibo a principios do século XX comparece ao lado do de Liño Lago, no XXI, e sitúase preto do horror da marea negra do Prestige vista por Berta Cáccamo, Pepe Galán e Francisco Leiro. Os nus da fotógrafa Victoria Diehl mergúllanse na intimidade, tanto como o home asomado ao abismo, retrato da soidade, do pintor Antón Pulido, e o inquietante lenzo mordido por insectos de Jorge Perianes. A exhuberacia colorista de Darío Álvarez Basso e a rotunda combinación de pedra e madeira de Manolo Paz, serven para pintar a imaxe dun país, tanto como as cinzas de Leopoldo Novoa, o bosque de fume de Pamen Pereira e os obxectos recollidos da natureza que Jorge Barbi converte en pezas artísticas.

                        

Para unha mellor navegación por este blog  usa o navegador GOOGLE CHROME. Descarga GOOGLE CHROME premendo AQUÍ.