O MATEMÁTICO MARCOS HORRO VAI PARA INXEÑEIRO INFORMÁTICO.

"Para comprender as matemáticas basta con ser un pouco curioso, non fai falta ser un xenio"

"O meu traballo consistiu en sacar conclusións sobre por que un foco paraboloide emite feixes de luz paralelas"

Marcos Horro Varela é un alumno avantaxado. Ten 18 anos e acaba de concluír a súa etapa de bacharelato no Ramón Cabanillas de Cambados e mañá enfróntase durante unha hora cun relatorio nun congreso reservado a profesores de Matemáticas de Galicia, organizado cada dous anos pola asociación Agapema.

O estudante é autor dun traballo no que basicamente demostra o por que un foco tradicional, curvado, e, xa que logo, con forma de parábola, emite feixes de luz paralelos e rectos.

O problema era resolto antes de forma inversa á que realizou o estudante, é dicir, desde un programa informático elaborábase o foco ou lanterna. Horro decidiu facer o proceso ao revés e sacar conclusións, e mañá terá que explicalas aos expertos en Matemáticas.

-A misión que se lle encomenda de enfrontarse a expertos profesores de Matemáticas nun congreso cun traballo de estudante de bacharelato parece cando menos arriscada. Cando decide que o seu traballo ten ese interese?

-Certo que parece paradoxal que un estudante pretenda darlle clases maxistrais a consagrados profesores. Pero é necesario ter en conta que eu só extraín as conclusións dun exercicio práctico que me encargou o meu profesor de Matemáticas no Cabanillas co obxectivo de subir nota a final de curso. En definitiva quen dirixe o traballo e propono é Benito Búa, o meu profesor de matemáticas de primeiro curso de bacharel.

-Entón cal foi a súa participación?

-O meu traballo consistiu en analizar uns focos e lanternas para sacar conclusións e crear un modelo para computador. Trátase de elaborar un proxecto de modelización no que se comproba que a realidade e as matemáticas van unidas.

-En que consiste o problema que lle expuxo Benito Suárez aquel verán de primeiro curso de bacharel para superar a nota?

-O exercicio consistía en que buscase tres lanternas ou focos con forma de paraboloide e cunha lámpada de filamento como emisor de luz e obter conclusións. Tiven que cortar as lanternas e cun programa informático recreei virtualmente como se reflexiona a luz e compareino coa realidade. Puiden demostrar que calquera foco baséase en propiedades matemáticas e físicas. Como lle dixen, o proceso realiceino de forma inversa á que normalmente realiza un enxeñeiro.

-Ademais da dirección do seu profesor. tivo outro tipo de axuda para chegar ás súas conclusións?

-O profesor Búa encargounos o traballo a dous alumnos, pero o meu compañeiro botouse atrás e continuei eu só porque me enchía de curiosidade. Ao chegar setembro terminouno pero as conclusións non me convenceron e quixen continuar con el durante o seguinte curso, aínda que xa non me serviría para mellorar nota. Acabeino e creo que as conclusións que obtiven son interesantes para expolas agora neste congreso.

-Canto lle levou o traballo?

-Un ano e uns meses para chegar a interpretar todo o que tiña diante.

-En definitiva, actuou como un xenio. Para as Matemáticas é preciso ter un coeficiente intelectual superior?

-Nin moito menos. O único que se necesita é sentir curiosidade por un tema e ter tempo. Ademais o computador é unha gran axuda pois se poden facer comparacións. Logo só é necesario comprender os resultados. Eu sentín moita curiosidade polo problema que se expuña porque se trataba de determinar por que un feixe de luz recto obtense dunha parábola. Con exemplos prácticos apréndese mellor e ven as matemáticas como parte da realidade. Non son só ecuacións. Unha materia moi útil para comprender a realidade

-Este traballo tamén lle reportará outras experiencias a nivel persoal. Polo menos encamiñoulle para a elección dunha carreira universitaria?

-A próxima semana comezo as clases na Universidade. Elixín Enxeñería Informática que vou estudar na Universidade da Coruña.

-Abandona as matemáticas puras?

-Sempre me gustou a informática, onde tamén se aplican leis matemáticas. O traballo que realicei axúdame a comprender moito mellor a realidade e, por exemplo, abriume a curiosidade cara á óptica que creo que agora comprendo moito mellor.

-Que intentou o seu profesor cando lle expuxo este traballo?

-Ademais de subirme a nota do curso, o que o profesor quixo é que demostrase que a modelización matemática é unha das ferramentas que proporciona esta disciplina. O meu profesor quedou encantado e non só recomendoume que o presentase no congreso senón que intentou outros modos de divulgación do mesmo, aínda que parece difícil que se publique nunha revista científica porque é moi longo e complexo.

-Durante canto tempo vai intervir no congreso?

-Primeiro será o meu profesor de Matemáticas, Benito Búa quen fará unha breve presentación do traballo e eu intervirei durante o resto da hora que ten asignada.

-Sabe que non é habitual que un alumno participe nun congreso de expertos. Con que ánimos atópase?

-Recoñezo que é infrecuente, pero só teño que expor o meu traballo.

A.T. - CAMBADOS