PESE AS ESCASAS VENDAS A HOSTALERIA QUERE REPETIR A EXALTACIÓN DA ZAMBURIÑA.

A hostalería quere repetir as xornadas da volandeira pese ao índice discreto de vendas .A actividade aínda se celebra ata este domingo, e os 15 negocios participantes confían en que estes días haxa máis clientes. 

O índice de vendas das xornadas da zamburiña están sendo discretos, pero a hostalería de Cambados quere repetir a experiencia. Por unha banda porque aínda quedan os que se supón que serán os días de maior afluencia de xente -as xornadas terminan aínda o domingo-, e segundo porque están convencidos de que aínda que ao final non se faga un gran negocio este tipo de actividades colectivas son o camiño a seguir. 

Aragunde

José Luís Aragunde, que participa nas xornadas con dous locais, o Ribeira de Fefiñáns e o Vagoviños, afirma que "vale a pena volver intentalo o ano que vén. Hai que facer este tipo de iniciativas, e amplialas a máis produtos". Unha idea que comparte Miguel Solla, da Casa de Miguel, que tamén é vicepresidente de Cambados Zona Centro, a entidade que organizou este certame da volandeira. "Poderiamos intentalo con outros mariscos típicos de Cambados, como a ostra ou a vieira". 

Aragunde conta que no caso dos seus dous establecementos "está habendo algo os fins de semana, pero de luns a xoves nada. É máis ou menos o que esperaba, porque esta actividade é interesante, pero está moi condicionada pola crise". No Mar de Arousa fan o mesmo diagnóstico. "Abrimos o día que empezaron as xornadas e no noso caso vendemos moi pouca volandeira. A ver se agora durante a ponte anímanse un pouco as cousas", relata Antonio González. 

Elvira Romay

Para Elvira Romay, de Lume de Leña, "hai que repetir. Pódenselle buscar peros a estas xornadas, pero a iniciativa é importante e necesaria. Temos que animar á xente a que salga de casa e probe cousas novas". E Antonio González, de Mar de Arousa, opina que "hai que deixar pasar un ou dous anos máis para que a xente coñeza as xornadas e colla o costume de probar a zamburiña estes días. Este é o camiño a seguir se queremos competir. Para nós é algo que leva poucos gastos, e a cambio publicitámonos e ata nos damos a coñecer entre novos clientes". 

Antonio Botana

Pero no que coinciden case todos os hostaleiros consultados onte é en que a crise influíu moito nestas xornadas, que se organizaron por primeira vez en Cambados e que se presentaron fai unha semana no Hostal dous Reis Católicos de Santiago de Compostela, coa finalidade de atraer á vila arousá a turistas doutros puntos de Galicia. Antonio Botana, do Pandemonium, afirma que "está todo bastante frouxo. No noso caso non sacamos moita zamburiña. Pero está dentro da tónica xeral. Hai pouco movemento na hostalería". 

Elvira Romay di que no seu caso "houbo moito ambiente nos dous fins de semana, sobre todo no primeiro" e tamén ten esperanzas de que estes días as vendas sexan boas. "A xente anda moi xusta de orzamento, pero confiamos en que haxa algún día bo". 

Miguel Solla

Finalmente, Miguel Solla asegura que "as xornadas están indo bastante ben. O prezo de cinco euros unha ración de zamburiña non está nada mal, e iso animou a moita xente". 

Nas xornadas participan 15 establecementos de Cambados, e en cada un deles ofrecen unha preparación distinta de volandeira, un marisco da familia da zamburiña. Os prezos son iguais en todos os locais: cinco euros a ración de volandeira; e 12 euros a ración deste marisco acompañada dunha botella de albariño da marca recomendada pola casa. 

En Lume de Leña apuntan que no seu establecemento os clientes están optando máis por pedir só a ración de marisco, mentres que na Casa de Miguel sae máis a oferta de volandeira e albariño a 12 euros. En canto a propostas para próximas edicións, Elvira Romay suxire organizar un concurso entre os hostaleiros para que os consumidores ou un xurado escollan a mellor tapa. 

Bar Reboredo

En canto aos clientes si entrarán no sorteo de 15 vales de consumición por valor de 20 euros cada un. Para poder participar teñen que probar a volandeira en polo menos catro locais, onde se lles selará un cartón. 

Entre as preparacións que se serven hainas en empanada, con salsa de vieiras ou nécoras, acompañada de cogomelos ou froitos secos, con pisto de biscaíña ou vinagreta de algas.

Cociñeiros do parador

PERO SEN DÚBIDA NINGUNHA O QUE MAIS SABE DE ZAMBURIÑAS E ESTE VELLO LOBO DE MAR QUE TEN CAPTURADO MILES DELAS E SABOREADO OUTRAS TANTAS, SESITO CASAIS.