CAMBADOS, BERCE DUN PROBABLE NOBEL.

A PRIMEIRA VACINA CONTRA A “ENFERMIDADE DO ESQUECEMENTO” NACE DA MENTE DUN CAMBADÉS 

En 1955, a capital do albariño era escenario do nacemento de Ramón Cacabelos García e onte, 57 anos despois, o mundo asistía á presentación dun dos seus maiores logros e un fito na historia da medicina. A súa ambición investigadora no campo das enfermidades neurodexenerativas permitiu o deseño da primeira vacina preventiva e terapéutica do Alzheimer, a EB-101, que podería empezar a comercializarse dentro dunha década. 

O cambadés liderou o equipo de científicos que está retando á enfermidade do esquecemento desde o seu Centro de Investigación Biomédica EuroEspes e con moi boas expectativas de futuro. E é que os ensaios realizados en ratos transxénicos evidencian a capacidade da vacina de previr o mal. Segundo o seu estudo, os animais inmunizados non o desenvolveron nin sufriron os problemas de saúde que puxeran punto e final a ensaios anteriores. Pero hai máis, porque nos roedores que xa presentaban síntomas antes de aplicarlle a vacina, logrouse reducir a evolución da enfermidade, detendo o proceso dexenerativo, e reducíronse de xeito "espectacular" os trazos que caracterizan ao cerebro do enfermo. 

O Alzheimer é unha enfermidade incurable e hereditaria que se diagnostica a unha persoa no mundo cada catro segundos pero cos avances do equipo de Cacabelos ábrese a vía da prevención e de incrementar a esperanza de vida e mellorar a de quen xa a padecen. Pero tamén por dignidade dos pacientes pois, segundo el, é o mal “que máis dana a nosa dignidade como seres humanos”. Aínda que, o doutor falaba onte desde a prudencia, indicando que só sería válida no 40% ou 50% dos casos e tampouco está de acordo cunha administración indiscriminada. "Non sería partidario nunca na enfermidade do Alzheimer que, aínda que saquemos un fármaco ou vacuna aparentemente boa, déase a granel". De feito, a proposta é a súa aplicación aos 35 anos no caso de persoas en risco, por motivos xenéticos ou hereditarios, e aos 45 no resto. 

Con todo, a última palabra terana os ensaios clínicos con seres humanos e EuroEspes está negociando xa con diversas multinacionais para realizalos. Este proceso podería prolongarse entre oito e dez anos e, de ser favorables, poñeríase no mercado. 

INQUEDANZAS 

A EB-101 resulta de anos de investigación. De feito, fai xa algún tempo que se presentou en sociedade aínda que foi agora cando obtivo a patente en Estados Unidos. Pero tamén da mente inqueda de Cacabelos, con formación médica na Facultade de Oviedo pero que se foi alén do mundo (Xapón) a indagar nas enfermidades neurodexenerativas. Á volta, o seu posto como profesor universitario non cumpría coas súas expectativas e fundou EuroEpes. 

Un nacemento do que os cambadeses tamén poden sentirse orgullosos pois, segundo desvelaba o diario O País nunha información de 1995, "recorreu aos seus amigos e os seus paisanos de Cambados" para reunir os 10 millóns de pesetas cos que puxo en marcha este centro pionero en España. De feito, el sempre se acorda daqueles socios fundadores, mesmo no seu discurso polo décimo aniversario da institución. 

Un artigo de LUCÍA ROMERO