EMILIO ABAL , UN PRODUTO DA CANTEIRA CAMBADESA QUE TRIUNFA EN PONTEVEDRA

«PASARÓN PESOUME, SI».

O XUVENIL, PROCEDENTE DO CAMBADOS, DEBUTOU ANTE A SÚA AFECCIÓN

O cambadés Emilio Abal Cousido leva sete anos na disciplina do Pontevedra. Chegou ao Lérez procedente do Cambados, e cando está a piques de cumprir os 19 anos, o domingo debutou en Pasarón, unha semana despois de estrearse co primeiro equipo en Carballo ante o Bergantiños.

-¿Como foi o seu debú en Pasarón, ante a esixente afección granate?

-Foi unha sensación especial tras sete anos no clube, dende infantís. Quixen xogar en ese campo cunha afección que sempre anima. Contento pola vitoria do equipo, porque o meu partido non foi como agardaba, nin como o da pasada semana.

-¿Pesou o campo? ¿A responsabilidade?

-Pasarón pesoume, si. Estiven nervioso ao principio, perdín uns balóns importantes. Foi algo que non me sucedera ante o Bergantiños. Logo funme acomodando e cos ánimos dos compañeiros logrei superalo. Primeiro partido na casa con nervos, pero se teño outras oportunidades, demostrareille á afección que son de confiar.

-¿Por que pesa Pasarón? O míster dixo que o fixo ben en Carballo ante o Bergantiños, pero o domingo comezou con nervios e dúbidas.

-Pasarón pesa porque é un campo enorme, e é a túa casa. Psicoloxicamente afectoume, aínda que tamén tivo que ver o campo, que é de herba natural, e eu estou acostumado aos campos de herba artificial, como o do Bergantiños. Todo tivo que ver, pero aos final estaba máis acoplado ao campo e á contorna. Logo xa estaba máis tranquilo e fun entrando máis no xogo.

-¿Foi clave o apoio do equipo?

-Os compañeiros animáronme dende o principio, dende o meu primeiro fallo. Fixeran o mesmo en Bergantiños. Tamén tiven a axuda de Milo Abelleira.

-¿Que sensacións tivo en xeral do partido ante o Ordes, que chegou a Pasarón cunha xeira de 15 encontros sen perder?

-A verdade é que estou algo decepcionado. Fixen un bo partido contra o Bergantiños, e quería deixar moi bo sabor de boca en Pasarón. Tamén quería deixar máis pegada, xa que agora, afortunadamente, estánse a recuperar Iago Paz, Caco e Moisés. Quería aproveitar mellor a miña oportunidade.

-Nembargante, saiu aplaudido cando foi substituído por Cristóbal Domínguez no minuto 66.

-Si, aínda que o resultado acompañou. Saín do campo ledo polos aplausos. É unha honra recibilos, sobre todo, en Pasarón. Esta afección valora a súa canteira.

UNHA ENTREVISTA DE NINO SOTO

FOTOS: MARTINA MISER.