Cento vinte anos non se cumpren todos os días. Por iso a banda de música de Castrelo quixo festexar a ocasión ao grande. Farao durante o seu xa tradicional festival de bandas, que se celebrará o domingo nas instalacións da adega Condes de Albarei. Polo escenario pasarán tres agrupacións de música: a de Castrelo, a de Beade e a de Ribadumia. Tamén, decenas de fotos que tratarán de contar a historia dunha entidade que superou o centenario en moi bo estado de saúde.
«É un orgullo ter durante tantos anos un festival desta calidade», explicou o alcalde de Cambados, Luís Aragunde. E é que, ademais de cumprir 120 anos, a banda de Castrelo festexa tamén a decimonovena edición do seu tradicional festival de bandas. A cita será o domingo, a partir das catro e media da tarde, en Condes de Albarei. A entrada, como xa é habitual, é libre e gratuíta. Se o tempo permíteo, o espectáculo comezará cun pequeno desfile de todas as agrupacións participantes polos arredores da adega. Posteriormente, subiranse ao escenario as agrupacións de Beade e Ribadumia, ademais da banda anfitrioa. «Queremos invitar a toda a xente a que veña ao festival», explicou onte José Padín, presidente da asociación Manuel Padín Sotelo. «Temos que animar aos veciños dá comarca a que veñan a desfrutar desta tarde de música», engadiu Xaquín Xesteira, integrante da banda, a quen nos gostaria ver dando clase de instrumentos tradicionais nese Auditorio de Cambados, a ver cando se entera o Alcalde Luis Aragunde que ten a súa disposición o mellor gaiteiro de Galicia.
 |
| Xaquin Xesteira e os seus fillos Anxo e Roi nunha actuación da Banda de Castrelo no Auditorio de Cambados. |
Cada banda interpretará un total de tres pezas, «e un tema de composición galega que vai gustar moito», explicou Xesteira. Ademais, a agrupación de Beade interpretará o popular A pedra dá serpe , «que sen dúbida será do agrado de todos». A banda de Castrelo, pola súa banda, terminará a súa actuación cunha peza galega, que estará acompañada por unha gaita, por suposto, interpretada polo propio Xesteira.
Os responsables da banda non quixeron esquecerse dos máis pequenos da casa e animaron a todos os pais a levar aos seus fillos a este concerto. De feito, publicitaron o certame nos colexios. Tamén animaron aos pais a matricular aos escolares na escola de música e no conservatorio. Só así se garantirá «que haxa máis músicos para a banda», explicou Javier Cousido, directivo da agrupación de Castrelo. Da dirección da banda encárgase actualmente José Bugallo, que tamén dirixe a escola de música e o conservatorio cambadés. «Queremos que esta colaboración que se inicia entre escola e banda siga adiante», concluíu. Por outros 120 anos.
Nova extraída de "A Voz de Galicia".
Ningún comentario:
Publicar un comentario